By Moira Encina
Eagle News Service
(Eagle News) – Magkakaroon ng bagong tanggapan ang Korte Suprema sa halos anim na ektaryang lote sa loob ng New Clark City sa Tarlac na tinaguriang kauna-unahang smart, green, at resilient city sa bansa.
Ito ay matapos pormal nang lumagda sa Memorandum Of Understanding ang Korte Suprema at Bases Conversion and Development Authority (BCDA) para sa 5.8 hectare na Judiciary Complex.
Pinangunahan nina Supreme Court Chief Justice Lucas Bersamin, court administrator Jose Midas Marquez, at BCDA president at CEO Vivencio Dizon ang paglagda sa MOU.
Ayon kay Bersamin, sa darating na Setyembre planong simulan ang konstruksyon ng Judiciary Complex na magsisilbing regional office ng Korte Suprema.
Kapapalooban ito ng training center with living quarters, archive center at data center, gayundin ng pasilidad para sa attached agencies ng Korte Suprema tulad ng Philippine Judicial Academy, Judicial and Bar council at Mandatory Continuing Legal Education office.
Itatayo ang Judiciary Complex sa loob ng National Government Administrative Center (NGAC) sa New Clark City na nasa bayan ng Capas at Bamban.
Sinabi ni Bersamin na ang konsepto ng NGAC ay hakbang sa tamang direksyon na tinatahak ng bansa.
