(Eagle News) — Mas palalakasin pa ng Department of Education (DepEd) ang pagtuturo ng Filipino at Panitikan bilang bahagi ng basic education sa ilalim ng K-to-12 program.
Ito ang tiniyak ng DepEd kasunod sa naging pasiya ng Korte Suprema na alisin na ang temporary restraining order (TRO) sa kautusan ng Commission on Higher Education (CHED) na nagtatanggal sa Filipino at Panitikan bilang core subject sa kolehiyo.
Ayon kay Education Secretary Leonor Briones, hindi maaaring basta na lamang isantabi ang mga nasabing asignatura dahil nagpapaalala aniya ang mga ito ng pagiging Filipino.
Binigyang-diin ni Briones na kahit alisin na ang Filipino at Panitikan sa curriculum sa kolehiyo, mananatili pa rin ang mga ito sa basic education kabilang na sa Senior High School partikular sa liberal education at social science.
“Hindi naman ito mawawala, nailipat lamang ito sa Grades 11 and 12 which are equivalent to college levels so the students will have advanced Filipino and Panitikan. This has global perspective and they can compare the works of known Filipino literary authors compared to the global environment. This also includes analytical approaches so students can manifest their analytical competence,” pahayag ni Briones.
