MANILA, Philippines — Muling iimbestigahan ng Department of Justice (DOJ) ang kaso ng pagdukot sa Korean businessman na si Jee Ick-Joo. Ito ay matapos i-utos ng Angeles City Regional Trial Court na magsagawa ng reinvestigation sa kaso ang DOJ.
Itinakda ang preliminary investigation sa Biyernes, Pebrero 3 sa ganap na alas dos ng hapon (2:00 PM).
Kaugnay nito, ipinatawag ng DOJ ang walong respondent kabilang na ang mga suspek na pulis para sa kasong kidnapping for ransom at serious illegal detention
Kasama sa mga pinahaharap ay si Police Superintendent Rafael Dumlao, Team Leader ng binuwag na Anti Illegal Drugs Group na respondent na sa reklamo.
Pinasisipot din si Jerry Omlang, dating runner ng NBI na umaming kinausap ni SPO3 Ricky Sta. Isabel para isakatuparan ang operasyon kay Jee.
Ipinatawag na rin ang dating pulis na si Gerardo Santiago, may ari ng Gream Funeral Homes na pinagdalhan ng bangkay ni Jee at gayundin si Christopher Alan Gruenberg na owner ng kotse na kasama sa convoy nang dukutin ang biktima.
Kabilang sa pinadadalo sina Sta Isabel, SPO4 Roy Villegas, SPO4 Ramon Yalung at PO2 Christopher Baldovino.
Inimbitahan din ang maybahay ni Jee na si Choi Kyung Jin, kasambahay na si Marissa Morquicho at PNP Anti-Kidnapping Group Members senior Supt Glenn Dumlao, SPO3 Reynaldo Curampez at Senior Inspector Jonathan Rabanal.