(Eagle News) — Tuluyan nang humina ang southwest monsoon o hanging habagat at hindi na nakakaapekto sa kalupaan ng bansa.
Ayon sa Philippine Atmospheric Geophysical and Astronomical Services Administration (PAGASA), sa karagatan na lamang nakakaapekto ang habagat kaya maganda at maaliwalas na ang panahon sa buong bahagi ng Luzon.
Gayunman, makararanas pa rin ng mga panandaliang pag-ulan dulot ng localized thunderstorms lalo na sa hapon o gabi.
Samantala, ang low pressure area na binabantayan ng PAGASA ay huling namataan sa layong 415 kilometro silangan ng Guiuan, Eastern Samar.
Hindi pa rin ito inaasahang magiging bagong bagyo ngunit inaasahang tatama sa kalupaan sa eastern Visayas sa linggo.
Sa ngayon, ang trough ng LPA ay nagdadala na ng maulap na kalangitan na may kalat-kalat na pag-ulan, pagkulog at pagkidlat sa buong Visayas at Mindanao.
Ang bagyo naman na may international name na ‘Jebi’ ay huling namataan sa layong 2,500 kilometro silangan ng northern Luzon.
Napakalakas na ng bagyo at posibleng maging super typhoon sa mga susunod na araw ngunit hindi inaasahang tatama sa kalupaan ng bansa.